Margir kúabændur innan landa Evrópusambandsins hafa verulegar áhyggjur af þeirri stöðu sem muni skapast þegar mjólkurkvótakerfi Evrópusambandsins verður fellt niður árið 2015. Áhyggjurnar eru fyrst og fremst þær að þá muni einkareknar afurðastöðvar, í skjóli stórra smásöluaðila, ná svo miklum tökum á bændunum að vart geti annað gerst en að afurðaverðið muni lækka.

 

Þessi staða er þó afar misjöfn á milli landa, því í sumum löndum eru afurðastöðvarnar reknar sem samvinnufélög framleiðenda og þar eru áhyggjurnar eðlilega minni. Í öðrum löndum er löng hefð fyrir því að kúabændur séu eingöngu frumframleiðendur á mjólk og hafi ekkert með afurðavinnsluna að gera.
 
Í Frakklandi eru bæði til samvinnufélög kúabænda um rekstur afurðastöðva en einnig einkareknar afurðastöðvar. Nú hafa samtökin France Milk Board, en undir þau heyrir t.d. hið franska „LK“ (Association des Producteurs de Lait Indépendants) kynnt hugmyndir sínar um að taka upp mjólkurkvótakerfi sem eingöngu gildi í Frakklandi. Kerfi þetta yrði byggt á Kanadíska mjólkurkvótakerfinu sem er í raun breitt samstarf kúabænda um framleiðslu- og sölu hrámjólkur.

 

Að því gefnu að samtökin nái mikilli þátttöku franskra kúabænda er ljóst að hægt verður að bæði stjórna framboði mjólkur og ekki síst verðinu á henni og gera þannig sterkar innkaupakeðjur áhrifaminni/SS.