Beint í efni

Framleiðsla og sala nautgripakjöts 3.400 tonn

15.09.2015

Samkvæmt yfirliti um framleiðslu og sölu á kjöti sem út kom í gær, er framleiðsla og sala nautakjöts undanfarna 12 mánuði 3.400 tonn, það er samdráttur um 3% frá árinu á undan. Þrátt fyrir það eru vísbendingar um að framleiðslan sé að rétta úr kútnum; ef litið er til síðasta ársfjórðungs, sem er tímabilið júní-ágúst, þá er framleiðsla og sala á þeim tíma um þriðjungi meiri en á sama tímabili í fyrra. Þar gætir án efa áhrifa frá verkfalli eftirlitsdýralækna sl. vor, þegar slátrun lá niðri frá 20. apríl til 15. júní og uppsöfnun varð á sláturgripum. Í ágúst sl. var framleiðslan tæplega fjórðungi meiri en á sama tíma í fyrra. Sem fyrr selst öll framleiðslan nánast jafnharðan og birgðir á hverjum tíma nema aðeins nokkurra daga slátrun.   

 

Eins og fram kom hér á síðunni í gær, hefur innflutningur nautgripakjöts verið mikill á þessu ári og lítið minni en á sl. ári. Í töflunni hér að neðan má sjá magn og uppruna innflutningsins eftir löndum, frá janúar til júlí í ár. Upplýsingarnar koma frá Hagstofu Íslands./BHB

 

Land Magn kg
Bandaríkin 596
Belgía 2.737
Bretland 23.388
Danmörk 87.762
Holland 30.588
Ítalía 4.092
Litháen 15.064
Nýja-Sjáland 47.710
Pólland 42.029
Spánn 34.567
Þýskaland 315.905
Samtals 604.438