Nú þegar innan við ár er eftir að gildistíma núgildandi samnings um starfsskilyrði mjólkurframleiðslunnar, er ekki úr vegi að horfa yfir þróun á framleiðslu og sölu mjólkurafurða undanfarinn áratug, en núverandi samningur tók gildi 1. september 2005 og hann rennur út 31. desember n.k. Eins og sjá má í töflunni hér að neðan, var innvigtun mjólkur 36,5 milljón lítrum meiri árið 2015 en tíu árum áður. Sala á fitugrunni jókst á þessum tíu árum um rúmlega 32 milljónir lítra og á próteingrunni jókst hún um rúmlega 10 milljónir lítra. Lengst af þessu tímabili, var mjólkurframleiðslan um 8-10 milljónum lítra umfram neyslu á innanlandsmarkaði. Rétt er að taka fram, að tölur um sölu mjólkurafurða miðast við staðlað efnainnihald mjólkur, en tölur um innvigtun eru eins og mjólkin kemur fyrir og taka ekki tillit til breytilegs fitu- og próteininnihalds.

 

Einnig er athyglisvert að sjá hvað sveiflan í fitusölunni er gríðarlega mikil; á einum áratug fer sala á fitu úr því að vera rúmlega 11 milljón lítrum minni en á próteini, yfir í að vera rúmlega 10 milljón lítrum meiri en próteinsalan. Aukningin í fitusölunni er líka stöðug nánast allt tímabilið; er mjög mikil alveg til 2009, síðan kemur töluvert bakslag 2010 og 2011. Eftir það er söluaukning á áður óþekktum hraða þar til kemur fram á árið 2015, þegar hægist mjög um./BHB

 

Ár	Innvigtun, mió. ltr.	Sala á próteingrunni, mió. ltr.	Sala á fitugrunni, mió. ltr.
2005	109,5	112,3	100,8
2006	117,1	113,2	103,9
2007	124,8	114,9	108,9
2008	126,1	117,1	112,3
2009	125,6	117,7	115,6
2010	123,2	114,7	110,7
2011	124,8	113,7	111,5
2012	125,1	115,5	114,1
2013	122,9	117,6	120,8
2014	133,5	121,2	129,0
2015	146,0	122,6	132,8