Framleiðsla á kjöti í október var 2,5% minni en í sama mánuði í fyrra. Mest munar þar um 31,4% minni framleiðslu á alifuglakjöti og síðan 9,6% samdrátt í nautakjötsframleiðslu. Síðastliðna tólf mánuði hefur framleiðsla á kjöti aukist um 2%. Sala á kjöti var 10,1% meiri í október en í sama mánuði í fyrra. Langmest munar þar um 40,1% aukningu í kindakjötssölu. Söluaukninguna má m.a. rekja til þess að neytendur hafi keypt meira nú en áður í frystikistur sínar en mikið bar á að kjöt var boðið til sölu í heilum og hálfum skrokkum.

Einnig var aukning á heimtöku framleiðenda úr sláturhúsi. Hún nam 262 tonnum í október í ár en var 219 tonn á sama tíma í fyrra. Sala alifuglakjöts var 13,8% minni en í október 2007 en framleiðsla og sala á svínakjöti jókst um ríflega 3%.

Framleiðsla og sala á hrossakjöti var einnig umtalsvert meiri en í október 2007 þó sala sl. tólf mánuði hafi dregist saman um 11,3%.

Sala á mjólkurvörum var með besta móti í októbermánuði. Miðað við sama mánuði í fyrra var mest söluaukning á dufti (61,25%) viðbiti (20,2%) og mjólk (11,34%). Síðastliðna tólf mánuði hefur sala á próteingrunni aukist um 3,35% og hefur nú rofið 118 milljón lítra múrinn. Sala á fituríkum vörum hefur þó aukist hlutfallslega enn meira og heildarsala á fitugrunni sl. tólf mánuði var tæplega 112,9 milljónir lítra, 4,7% meiri en næstu 12 mánuði á undan. Þetta er mjög mikilvægt fyrir mjólkurframleiðendur.  Framleiðsla mjólkur síðastliðna 12 mánuði var 125,8 milljón lítra, 1,24% aukning á ársgrundvelli. Athygli vekur að framleiðsla í september var rösklega 12% meiri en í september 2007 en framleiðsla í október er hins vegar 2,78% minni en á sama tíma í fyrra.

Nánari upplýsingar um framleiðslu og sölu búvara í október má finna hér.
/EB