Skrifstofa búnaðarmála innan Matvælastofnunar birti í sl. viku yfirfarnar tölur um framleiðslu nautgripakjöts árið 2015. Samkvæmt því var hún 3.606 tonn á nýliðnu ári, sem er aukning um 3,2%. Salan var nánast nákvæmlega sú sama, eins og vant er, 3.610 tonn, sem er sömuleiðis aukning um 3,2% frá fyrra ári.

 

Sé litið til einstakra flokka, þá stóð framleiðsla ungnautakjöts nánast í stað með 2.122 tonn, sem er 0,8% samdráttur frá fyrra ári. Framleiðsla þess hefur þó farið vaxandi undanfarna mánuði; á síðasta fjórðungi ársins jókst hún um 14% frá sama tíma 2014. Framleiðsla kýrkjöts jókst um rúm 8% árið 2015 og var 1.427 tonn, á móti 1.318 tonnum árið áður. Það vekur athygli að kúaslátrun í desember 2015 var tæplega 40% meiri en í sama mánuði fyrir ári. Framleiðsla ungkálfa var 42 tonn á árinu, sem er um 40% aukning frá árinu á undan. Innlegg alikálfa var tæp 15 tonn á nýliðnu ári, á móti 9 tonnum árið 2014. Nánar verður farið í upplýsingar um flokkun og meðal fallþunga þegar þær upplýsingar liggja fyrir./BHB