Fræðslufundur MAST um áburðareftirlit er í dag
08.02.2012
Matvælastofnun, í samstarfi við Landbúnaðarháskóla Íslands og Matís, heldur fræðslufund í dag um eftirlit með áburði. Fundurinn stendur frá kl. 15:00-16:30 og verður haldinn á Stórhöfða 23. Á fundinum verður fjallað um framkvæmd áburðareftirlits hérlendis, kadmíum og uppsöfnun þungmálmsins í jarðvegi og landbúnaði, ásamt mögulegum áhrifum þess á lýðheilsu.
Mikil umræða um áburð hófst í byrjun árs í kjölfar birtingu Matvælastofnunar á skýrslu um niðurstöður áburðareftirlits á síðasta ári. Sýnatökur stofnunarinnar leiddu í ljós að áburður frá Skeljungi innihélt tvöfalt til þrefalt meira magn af kadmíum en leyfilegt er hér á landi. Í kjölfarið hófst áköf umfjöllun um kadmíum þar sem gagnrýni á eftirlitið var óvægin.
Á fræðslufundinum verður fjallað um áburðarnotkun og framkvæmd áburðareftirlits hérlendis. Rætt verður um kadmíummálið svokallaða, birtingu eftirlitsniðurstaðna og nýjar reglur sem heimila birtingu niðurstaðna áburðareftirlits þegar þær liggja fyrir. Uppsöfnun kadmíums í jarðvegi og upptaka í korn, hey og búfé verða til umfjöllunar, auk heilsuspillandi áhrifa kadmíums á fólk ef slík uppsöfnun og upptaka á sér stað.
Hægt verður að fylgjast með fræðslufundinum í beinni útsendingu á vef Matvælastofnunar (www.mast.is) undir Útgáfa – Fræðslufundir. Þar verður einnig birt upptaka að fræðslufundi loknum.
Fyrirlesarar:
Valgeir Bjarnason, sérfræðingur áburðareftirlits hjá Matvælastofnun Ríkharð Brynjólfsson, prófessor við Landbúnaðarháskóla Íslands
Ólafur Reykdal, verkefnastjóri hjá Matís
Allir eru velkomnir á þennan fund en gengið er inn í húsnæði stofnunarinnar að norðanverðu (Grafarvogsmegin)/SS.