Um sex þúsund manns voru viðstaddir formlega setningu Landsmóts hestamanna á Gaddstaðaflötum á Hellu í blíðskaparveðri í gærkvöldi. Um 500 knapar og hestar þeirra tóku þátt í hópreið allra hestamannafélaga á landinu en á eftir fánaberum riðu knapar í viðhafnarbúningi og fyrirsvarsmenn íslenskrar hestamennsku. Í fylkingarbrjósti voru einnig ráðherrar úr ríkisstjórninni, Geir H. Haarde forsætisráðherra, Þorgerður Katrín Gunnarsdóttir menntamálaráðherra, Einar K. Guðfinnsson landbúnaðarráðherra, Björgvin G. Sigurðsson viðskiptaráðherra og Árni Mathiesen fjármálaráðherra, auk Sturlu Böðvarssonar, forseta Alþingis. Fluttar voru setningarræður og Garðar Cortes stjórnaði fjöldasöng. Á vef landsmótsins, www.landsmot.is, er greint frá því að mikil stemming sé á mótssvæðinu en mótshaldarar búast við miklum fjölda gesta á svæðið um helgina enda hápunktar mótsins framundan og veðurútlit gott.

Landsmót hestamanna ehf. (LM ehf.) er einkahlutafélag að 2/3 hluta í eigu Landssambands hestamanna og að 1/3 hluta í eigu Bændasamtaka Íslands. Félagið var stofnað árið 2001 með það að markmiði að vera rekstaraðili Landsmótanna. Fyrsta mótið sem félagið stóð að var árið 2002 á Vindheimamelum í Skagafirði og hefur rekstur mótanna verið með þeim hætti síðan.

Dagskrá Landsmóts hestamanna og úrslit má sjá á vef mótsins, www.landsmot.is