Eins og fram hefur komið hefur afurðastöðvaverð á mjólk í mörgum löndum Evrópu farið ört lækkandi á undanförnum vikum og gildir þar einu hvort horft sé til Skandinavíu, Stóra-Bretlands eða norðurhluta Evrópu. Þetta er vegna mikils framboðs á mjólk í kjölfar afurðaaukningar í flestum löndum Evrópu ásamt metframleiðslu í Nýja-Sjálandi.

 

Nú er algengt afurðastöðvaverð 40-45 íkr./líterinn, en auk þess fá kúabændur opinbera styrki í formi hektarastuðnings og deilt á framleiðsluna nema þessir styrkir oft 5-10 krónum á líter (misjafnt eftir löndum). Á sama tíma og afurðaverðið hefur lækkað hefur verð á kjarnfóðri rokið upp og ýtt enn frekar undir tap framleiðslunnar.

 

Kúabændur í Bretlandi hafa staðið fyrir mótmælum við stórmarkaði og verslanir í nokkrar vikur til þess að fá neytendur til þess að átta sig á alvarleika málsins og nú hafa samtök kúabænda í Austurríki, Þýskalandi, Belgíu og Frakklandi tilkynnt að þau séu tilbúin til sambærilegra aðgerða.

 

Í Skandinavíu er minni hefð fyrir mótmælum bænda en sunnar í Evrópu en kúabændur hafa þó staðið fyrir mótmælum í Svíþjóð. Í Danmörku eru skiptar skoðanir meðal kúabænda á tilgangi mótmæla en svo virðist sem afurðaverðslækkunin í gær muni ýta hraustlega við bændunum/SS.