Tveir tuddar vestur í Bandaríkjunum lentu heldur betur í lífsreynslu nýverið er þeir náðu með einhverjum hætti að festast saman á hausunum  í steinefnastampi! Eitthvað hefur kappið líklega farið með annan þeirra og hinn ekki gefið neitt eftir og því lá væntanlega beinast við að troðast við hlið þess sem fyrri varð til að komast í stampinn, sem vel að merkja er ekki með nema um 50 cm. opnun. Niðurstaðan varð svo auðvitað sú að þeir sátu svo tryggilega fastir að það varð að saga trogið í sundur til að losa þá úr prísundinni.

Bændurnir sem eiga hjörðina, þau Rebecca Ward Gets og Kim Getz byrjuðu nú á því að saga í stampinn með handsög en það dugði nú skammt svo keðjusögin var sótt og þá gekk betur að losa tuddana. Uppákoman var tekin upp og svo var myndbandinu hlaðið niður á Facebook og þegar þetta er skrifað hefur það verið skoðað 1,9 milljón sinnum! Með því að smella hér má sjá þetta skondna atvik með því að smella hér/SS.