Nýverið voru danskir kúabændur sektaðir af Evrópusambandinu um hátt í 700 milljónir króna vegna offramleiðslu á mjólk á síðasta verðlagsári (endaði í apríl). Athygli vekur hinsvegar að fyrir nokkrum vikum var ítölskum kúabændum sleppt við álíka sekt, fyrst og fremst vegna þess að þarlendir bændur hafa lítið sem ekkert tekið mark á því uppgefna greiðslumarki sem Evrópusambandið setti á Ítalíu!

Fram kemur í erlendum fréttum að Danir hafi á nýliðnu verðlagsári farið vel framúr greiðslumarksþakinu og að það kalli einfaldlega á sektir frá Brussel. Kaj Ole Pedersen, talsmaður samtaka afurðastöðva í dönskum mjólkuriðnaði, sagði að reglurnar væru skýrar og að Danir fari að sjálfsögðu að þeim. Hann viðurkenndi þó að verulegt ósamræmi væri á framkvæmd reglna Evrópusambandsins, enda sluppu Ítalir við sambærilegar sektir og við það tækifæri fengu þeir aukinheldur næstu 14 ár til að aðlaga framleiðsluna að greiðslumarki landsins!