Í dag tilkynnti Lífland um 4% hækkun á verði kjarnfóðurs sem taka á gildi á morgun, 1. júlí. Í tilkynningu félagsins er sérstaklega tiltekið að sojamjöl hafi hækkaði í verði að undanförnu.  

 

Samkvæmt innflutningsskýrslum Hagstofu Íslands hafa verið flutt inn um 830 tonn af sojamjöli til fóðurgerðar það sem af er árinu; janúar-maí. CIF verðmæti þessa innflutnings er rúmlega 43 milljónir króna, eða um 52 kr/kg. Innflutningurinn skiptist þannig skv. innflutningsskýrslum:

 

Mánuður innflutnings	Magn, kg	Verðmæti, kr CIF	Einingaverð, kr/kg
Janúar	250.000	13.497.194	53,99
Febrúar	200.000	10.665.455	53,33
Apríl	180.000	9.178.074	50,99
Maí	200.000	10.018.539	51,01
Alls og meðaltal	830.000	43.359.262	52,24

 

Af framangreindum upplýsingum verður ekki annað ráðið en að verð á soja, eins og það birtist á hafnarbakkanum hér á landi, hafi heldur farið lækkandi að undanförnu, enda hefur gengi krónunnar gagnvart helstu gjaldmiðlum verið að styrkjast umtalsvert að undanförnu. Um síðustu áramót var gengi evru 142 kr en er í dag 137 kr, gengi dollars var 130 kr um áramót en er 123 kr í dag. Þá hefur gengi sterlingspunds gefið mjög eftir sem kunnugt er; gengi þess um síðustu áramót var 192 kr en er í dag 165 kr. Það ástand skapar vafalítið ýmis kauptækifæri þar í landi.

 

Samtökunum er þó kunnugt um að nokkuð umrót hafi verið á heimsmarkaðsverði á soja á allra síðustu vikum og verð hafi hækkað í júní. Að 4% hækkun á kjarnfóðurverði byggi á verðþróun á einum mánuði, er hins vegar heldur rýrt tilefni að mati LK. Nánar verður rýnt í þróun á verði helstu hráefna til kjarnfóðurgerðar næstu daga./BHB