Samkvæmt spá alþjóða kornráðsins, International Grains Council, er þess nú vænst að kornuppskera ársins verði 2.053 milljónir tonna sem er nærri 100 milljón tonnum minna en síðasta ár. Á sama tíma er þess þó ekki vænst að eftirspurnin eftir korni minnki og verði í kringum 2.087 milljónir tonna. Því má búast við því að ákveðin spenna verði á kornmarkaðinum í ár og gæti þessi staða valdið hækkun á korni á heimsmarkaðinum.

Þessi staða er all óvenjuleg og hefur það ekki gerst í mörg ár að ganga þarf á kornbirgðir heimsins en birgðastaða korns hefur aukist nokkuð undanfarin ár og svarar hún í dag til 89 daga notkun á korni í heiminum. Þess ber að geta að um er að ræða spá Alþjóða kornráðsins sem auðvitað er háð ákveðinni óvissu enda gæti uppskera korns orðið meiri en spár gera ráð fyrir. Á hinn bóginn gæti uppskeran einnig orðið talsvert minni en spáin gerir ráð fyrir ef veðurfarsaðstæður verða ekki heppilegar fyrir kornrækt/SS.