Í fyrradag lauk uppboðsmarkaði GDT (Global Dairy Trade) með afar gleðilegum tíðindum enda varð meðalhækkunin heil 12,7% og er nú verðstuðull GDT kominn í 833, sem er einungis 4 stigum lægra en stuðullinn var í október á síðasta ári.

 

Sé litið lengra aftur í tímann er verðstuðullinn nú rúmlega 40% hærri en á sama tíma í fyrra en frá miðjum ágúst í fyrra og fram í byrjun október steig heimsmarkaðsverðið stöðugt. Óvarlegt er að gefa sér að slík þróun verði eins í ár en sé litið til ársins 2014 varð verðþróunin óveruleg frá ágúst og fram í desember svo það gæti bent til þess að verðið lækki amk. ekki mikið úr þessu og etv. fari enn hækkandi.

 

Hækkun heimsmarkaðsverðsins á þarsíðasta markaði í byrjun ágúst hefur þegar skilað sér í hækkun afurðastöðvaverðs hjá nokkrum afurðafélögum og því er viðbúið að hækkunin nú skili sér beint í hækkuðu afurðastöðvaverði hjá fleiri afurðastöðvum víða um heim/SS