Svissneska afurðafélagið Emmi hefur á undanförnum árum vaxið jafnt og þétt með því að kaupa upp minni afurðafélög. Nú hefur Emmi, í gegnum dótturfélagið Kaiku Corporacion Alimentaria, keypt mest allt hlutaféð í afurðafélaginu Surlat í Chile (Síle). Surlat er staðsett í Santiago og er stærsti framleiðandi landsins á geymsluþolnum mjólkurvörum eða G-vörum og er auk þess næst stærsta afurðafélag landsins í framleiðslu á mjólkursykurlausum vörum.

 

Surlat hefur gengið í gegnum mikla erfiðleika samhliða erfiðri efnahagsstöðu innanlands í Chile og telja margir að félagið hafi verið að þrotum komið. Emmi hafi með snarræði náð að kaupa hlutaféð á afar hagstæðu gengi og muni vafalítið fá mikið út úr þessum viðskiptum. Það er stefna Emmi að hlutfall erlendrar starfsemi félagsins verði amk. 50% og með þessum uppkaupum næst það markmið. Þess má geta að fyrir aðeins nokkrum dögum tilkynnti Emmi að það hafði keypt afurðavinnsluna Cowgirl Creamery Corporation í Kalíforníu/SS.