Beint í efni

Eldistilraun á Facebook!

29.04.2014

Í mars sl. fór af stað tilraunaverkefni í starfsstöð Landbúnaðarháskóla Íslands á Möðruvöllum í Hörgárdal sem ber heitið „Hámarks vaxtargeta íslenskra nauta til kjötframleiðslu“. Megin markmið tilraunarinnar er að ákvarða hámarks vaxtargetu íslenskra nauta í stíueldi, ásamt því að bera saman hámarks fóðrun og hefðbundna fóðrun m.t.t. fóðurmagns, fóðurnýtingar, eldistíma, sláturgæða, kjötgæða, framlegðar og kostnaðar við nautaeldi og kjötvinnslu.

 

Til að bera saman áhrif mismunandi eldis á slátur- og kjötgæði falla verða eftirfarandi þættir mældir eða metnir og skráðir í sláturhúsi:

 

• Þyngd skrokka og fallhlutfall.

• Íslenskt kjötmat og samkvæmt EUROP mati (holdfylling og fitustig).

• Sýrustig (pH) sólarhring eftir slátrun.

• Flatarmál hryggvöðva við næst aftasta rif.

• Samanburður einstakra vefja og vefjahópa (vöðvar/fita).

• Litamæling á vöðva.

. Kollagen- (bandvefs-) og fitumæling.

• Meyrni með áferðarmæli.

• Framlegð gripa í kjötvinnslu (afskurður).

 

Að lokinni allri gagnasöfnun kemur til tölfræðilegs uppgjörs og birtingar á niðurstöðum.

 

Tilgátan er að með sterkara eldi á ungnautum en nú tíðkast almennt sé hægt að auka verulega framlegð af þessari framleiðslu sem myndi þá væntanlega leiða til aukins framboðs á íslensku nautakjöti, búgreininni til hagsbóta.

 

Hægt er að fylgjast með framvindu verkefnisins á Facebook síðu þess, slóðin er hér að neðan.

 

Vaxtarhraði íslenskra nauta – Möðruvallatilraunin 2014-2017