Beint í efni

Einfalt ráð: bolta kúabursta á milligerði

19.09.2017

Margir kúabændur luma á góðum ráðum og einföldum lausnum þegar kemur að því að takast á við ólík verkefni og hér er dæmi um einfalda lausn við húðhirðu smákálfa og geldneyta. Í dag er það nú sjálfsagður hlutur að hafa möguleika á húðhirðu fyrir þessa gripi, rétt eins og fullorðnar kýr. Auðvitað er hægt að kaupa tilbúnar fínar lausnir en oft eru þær heldur kostnaðarsamar. Danski kúabóndinn Brian Hansen er nafngreindur sérstaklega í nýjasta tölublaði Magasin Kvæg, sem er danskt fagtímarit í nautgriparækt, en hann benti á einfalda lausn  svo kálfar geti sinnt lágmarks húðhirðu. Einfaldlega kaupa  tvo klóruhausa, t.d. gerð eins og sést á myndinni hér með fréttinni eða venjulega strákústa (ath. strákústar endast ekki sérlega vel), og skrúfa þá saman á milligerði á milli geldneytastía – „bak í bak“ og hafa þá með ca. 45 gráðu halla svo kálfarnir geti notað stærstan hluta af hausnum til húðhirðu. Einföld lausn sem óhætt er að mæla með.

 

Ef þú lumar á lausn á algengu vandamáli sem gæti gagnast fleiri bændum, smelltu þá endilega mynd af þinni útfærslu og sendu til okkar á: skrifstofa@naut.is/SS.