Í gær var kveðinn upp í Héraðsdómi Reykjavíkur dómur í máli Stjörnugríss hf gegn íslenska ríkinu, vegna álagningar búnaðargjalds. Stjörnugrís krafðist endurgreiðslu búnaðargjalds vegna áranna 2010-2014, auk dráttarvaxta og málskostnaðar. Dóminn í heild má lesa með því að smella á hlekkinn hér að neðan, en í stuttu máli var niðurstaða dómstólsins sú að fallist var að mestu á kröfur fyrirtækisins; ráðstöfun á þeim 0,9% af búnaðargjaldsstofni sem rennur til Bændasamtakanna, búgreinafélags og búnaðarsambands var ekki talin standast lög. Ráðstöfun á þeim 0,3% sem eftir eru og renna til Bjargráðasjóðs var hins vegar talin í samræmi við lög og stjórnskipunarreglur. Ekki liggur fyrir hvort dómnum verði áfrýjað til Hæstaréttar, en frestur til þess er 3 mánuðir.

 

Álagning búnaðargjalds er um 500 m. kr. á ári og undanfarin ár hefur nautgriparæktin staðið undir um 45% af gjaldstofni, eða sem nemur 220-230 milljónum króna á ári. Í tilfelli nautgriparæktarinnar renna 0,5% til búnaðarsambandanna (að mestu til RML), 0,35% til Bændasamtakanna (að hluta til RML), 0,30% til Landssambands kúabænda og 0,05% til Bjargráðasjóðs. 

 

Undanfarin ár hefur framtíð búnaðargjaldsins mjög verið til umræðu á vettvangi Landssambands kúabænda og samþykkti aðalfundur 2015 svofellda ályktun um framtíðar fjármögnun á starfi samtakanna:

 

Aðalfundur Landssambands kúabænda, haldinn í Reykjavík 12.- 13. mars 2015, felur stjórn að koma á fót starfshópi, í samstarfi við aðildarfélög, sem hafi það hlutverk að móta tillögur um framtíðar fjármögnun samtaka kúabænda og nauðsynlegar breytingar á samþykktum, í kjölfar afnáms innheimtu búnaðargjalds. Niðurstöður hópsins liggi fyrir eigi síðar en 1. október 2015 og verði afgreiddar á fulltrúafundi eigi síðar en 1. nóvember 2015. 

 

Fulltrúar í hópinn voru tilnefndir sl. vor, en vegna anna við margvísleg verkefni hefur hann ekki hafið störf. Stefnt er að því að það fari af stað von bráðar./BHB

 

 

Dómur í máli E-5097/2014. Stjörnugrís hf gegn íslenska ríkinu, kveðinn upp 6. janúar 2016