Nýverið voru teknar saman hjá Nautgriparæktardeild Þekkingarseturs landbúnaðarins í Danmörku (Videncentret for Landbrug, Kvæg) upplýsingar um skiptingu á fjölda kúa milli danskra kúabúa og ekki þarf að koma nokkrum á óvart að búin í Danmörku eru að jafnaði töluvert stærri en hér á Íslandi. Alls voru um síðustu áramót 4.475 bú skráð í mjólkurframleiðslu með 568.583 mjólkurkýr eða 127,1 mjólkurkú að jafnaði.

 

Miðað við upplýsingar úr hinu danska skýrsluhaldi er ekki ólíklegt að meðalframleiðsla danskra búa sé nú um 1,2 milljónir lítra mjólkur. Athyglisvert er hinsvegar að sjá hve mörg kúabú eru þrátt fyrir allt enn með tiltölulega fáar mjólkurkýr en 307 bú eru með færri en 9 skráðar mjólkurkýr. Stærsti flokkur búa liggur þó á bilinu 100-199 kýr eða 1.802 bú og í þessum flokki bú eru einnig flestar kýr eða 258 þúsund. 96 bú eru með fleiri en 400 mjólkurkýr og er meðalfjöldinn á þessum búum 498 kýr. Nánar má sjá þessar áhugaverðu upplýsingar í töflunni hér fyrir neðan. /SS

 

Flokkur kúa	Fjöldi búa	Fjöldi kúa
1-2	143	191
3-9	164	828
10-19	135	1.933
20-29	164	4.166
30-49	396	15.721
50-99	912	65.696
100-199	1.802	258.383
200-299	523	125.522
300-399	140	47.426
>400	96	48.817