Sem kunnugt er stendur HM í handbolta nú yfir og fer keppnin fram í bæði Þýskalandi og Danmörku. Keppnin hefur verið vel sótt af áhorfendum og svo virðist sem átökin á vellinum kalli oft á stórsteikur eftir leiki, amk. hjá áhorfendum! Samkvæmt fréttatilkynningu frá danska afurðafélaginu Danish Crown hefur fyrirtækið vart undan við að útvega nautakjöt fyrir veitingastaðina í Boxen í Herning, þar sem keppnin fer m.a. fram.

Alls hefur fyrirtækið nú selt sjö þúsund sérskornar steikur á framangreinda veitingastaði, en Danish Crown sér um að fullskera og vinna steikurnar svo gæðin verði tryggð. Hver vöðvi er handskorinn og tekur auðvitað tíma en það er þess vel virði segir í tilkynningunni, þar sem jafnframt kemur fram að eingöngu sé notast við danskt nautakjöt. Ávinningurinn skila sér svo bæði beint til bændanna sem útvega kjötið, sem og með bættum hag Danish Crown sem er samvinnufélag í eigu bænda/SS.