Beint í efni

Breytingar hjá MS

25.08.2012

Sigurður Rúnar Friðjónsson, sem hefur verið mjólkurbússtjóri MS á Akureyri frá árinu 2007, hefur nú verið ráðinn í nýja stöðu verkefnisstjóra í vöruþróun Mjólkursamsölunnar í höfuðstöðvum MS í Reykjavík. Þetta nýja starf felur auk þess með sér umsjón með og samræmingu á stærri innkaupum Mjólkursamsölunnar á umbúðum og hráefnum, sem  er einn af þremur stærstu kostnaðarþáttum í rekstri félagsins. Þessar breytingar eru þáttur í að styrkja vöruþróun Mjólkursamsölunnar í framleiðslu skyrvara með aukinn útflutning í huga og einnig þróun nýrra ostategunda og almennra mjólkurvara fyrir innlendan og erlendan markað.

 

Einar Sigurðsson, forstjóri Mjólkursamsölunnar, segir að mikilvægt sé fyrir bændur að skapa möguleika fyrir aukinn útflutning á unnum mjólkurvörum, einkum sérvörum á borð við skyr. Mjólkursamsalan hafi verið að hasla sér völl í útflutningi á skyri til Bandaríkjanna og Evrópu og á síðustu misserum hafi náðst mjög góður árangur af útflutningi til Finnlands. Að auki hafi félagið selt þekkingu og tækniþjónustu og fengið leyfisgjöld af skyrframleiðslu fyrir markað í Noregi, Svíþjóð og Danmörku. „Framundan er aukin áhersla á starfsemi að þessu tagi og að skiptir miklu máli að fá til þess verks mann með þekkingu og reynslu Sigurðar að samræma framleiðsluna hér heima og erlendis, styrkja vörumerki félagsins og leiða þróun á nýjum vörutegundum. Á sama tíma og félagið leitast við að styrkja útflutningsmöguleika erum við að fara í stærstu fjárfestingu félagsins um langa hríð með endurnýjun ostaframleiðslu á Akureyri“.

 

Sigurður hefur undanfarið undirbúið endurnýjun tækjabúnaðar í ostaframleiðslu MS á Akureyri og hann mun áfram starfa að því verkefni með starfsmönnum framleiðslusviðs þar til því lýkur á fyrri hluta næsta árs. Við starfi hans tekur Friðjón G. Jónsson en hann hefur verið verkstjóri MS á Akureyri frá árinu 2000/SS-fréttatilkynning MS.