Beint í efni

Bóndi í fangelsi fyrir að flytja nautgripi

13.02.2013

Kúabóndi í Norður-Wales hefur verið dæmdur í tíu mánaða fangelsi fyrir að hafa ítrekað flutt nautgripi á milli tveggja búa sinna, án þess að gera viðeigandi ráðstafanir vegna rannsókna á nautgripaberklum. Bóndi þessi, Mark Edward Payne, hefur átt í einhverju basli með að gera hlutina eins og yfirvöld vilja og átt í hálfgerðu stríði við yfirvöld vegna þessa.

 

Þarlend Matvælastofnun ákvað eftir margítrekuð brot á reglugerðum um sjúkdómavarnir að draga Mark fyrir dómstóla öðru sinni, en Mark þessi hafði áður verið uppvís að því að brjóta gildandi reglur þegar hann hefur flutt nautgripi af búi sem skráð er á konu hans yfir á bú sem hann er skráður fyrir.

 

Nautgripaberklar er sá sjúkdómur í Stóra-Bretlandi sem veldur einna mestu tjóni og kostar hið opinbera mikla fjármuni árlega í styrki vegna niðurskurðar og því er tekið afar hart á málum þegar bændur fara ekki að gildandi reglum/SS.