Bændasamtökin hafa kunngjört stefnu sína í alþjóðamálum, en eins og kunnugt er, þá eru alþjóðaviðræður framundan í Cancun á vegum WTO. Fram kemur í yfirlýsingunni að Bí styður við hugmyndir um tollvernd og hóflegar breytingar á stuðningsheimildum landanna. Yfirlýsingin er í heild hér að neðan.

Hér að neðan er yfirlýsing BÍ:

 

 

Ráðherrafundur WTO í Cancun 10. – 14. september 2003

Áherslur Bændasamtaka Íslands
vegna samningaviðræðna um viðskipti með landbúnaðarafurðir

Bændasamtök Íslands fagna þeim áherslum íslenskra stjórnvalda sem settar hafa verið fram í yfirstandandi samningalotu um viðskipti með landbúnaðarafurðir. Mikilvægt er að ná samstöðu með sem flestum ríkjum um sameiginleg áhersluatriði, svo vinna megi þeim brautargengi í samningaviðræðunum.

Umræða um samninginn hefur staðið í mörg ár. Á aðalfundi IFAP (Alþjóðasamtaka búvöruframleiðenda) á Filippseyjum 1998 var hart tekist á um sameiginlega stefnu þátttökuþjóðanna. Þar stóðu Norðurlöndin þétt saman að því að fá inn í ályktun fundarins að taka skyldi tillit til fjölþætts hlutverks landbúnaðarins, verndun fjölskyldubúsins og að gefa svigrúm til innanlandsstuðnings en þrýsta fremur á niðurskurð útflutningsbóta.

Í Doha samningsumboðinu er skýrt að í yfirstandandi samningalotu skuli taka tillit til sjónarmiða sem ekki eru viðskiptalegs eðlis. Í framkomnum tillögum formanns landbúnaðarsamninganefndarinnar er ekki tekið nægt tillit til þessa. Skorað er á íslensku samninganefndina að fylgja því áfram fast eftir að samið verði um þessi atriði jafnhliða öðrum þáttum samningsins. Áhersla verði lögð á að samningsniðursaðan nú feli í sér möguleika til að styðja við landbúnað með tilliti til fjölþætts hlutverks hans hér á landi sem og annarsstaðar í heiminum.

Varðandi þau þrjú megin svið sem fjallað er um leggja Bændasamtök Íslands áherslu á eftirfarandi.

Markaðsaðgangur:
Lækkun tolla verði unnin eftir sömu aðferðafræði og samið var um í Uruguay lotunni. Þetta tryggir sveigjanleika og gerir kleift að taka tillit til vara sem eru sérstaklega viðkæmar fyrir innflutningi og sjónarmiða sem ekki eru viðskiptatruflandi. Ítrekað verði að innflutningur á öðrum búvörum en þeim sem framleiddar eru hér á landi sé í langflestum tilfellum tollalaus og tekið verði tillit til þess að við höfum þegar lagt mikið af mörkum í opnun markaða fyrir landbúnaðarafurðir. Einnig verði staðinn vörður um möguleika hvers lands til að takmarka innflutning við afurðir sem standast heilbrigðiskröfur viðkomandi lands (SPS – samkomulagið).

Innanlandsstuðningur:
Tekið er undir þær áherslur sem koma fram í yfirlýsingu G9 hópsins til fundarins í Cancun. Ekki verði samið um þak eða niðurskurð á stuðningi sem telst í Græna boxinu. Samið verði auk þess um nægjanlegan sveigjanleika í Bláa og Gula boxinu til að styðja við innlendan landbúnað. Íslenskur landbúnaður er afar smár í sniðum með mjög takmarkaðan útflutning. Stuðningur í Gula boxinu hefur því nær engin áhrif á heimsmarkað. Minnt er á að endurskoðun landbúnaðarstefnu ESB nær ekki til stuðnings sem greiddur er á harðbýlum svæðum (LFA og norðlægur stuðningur), sem er að miklu leyti tengdur framleiðslu í einu eða öðru formi. Það er í hæsta máta sanngjarnt að svigrúm sé til að styðja við íslenskan landbúnað með sambærilegum aðferðum og þar er gert.

Útflutningsbætur:
Útflutningsbætur á landbúnaðarvörur hafa verið lagðar af og því höfum við samningssvigrúm hvað þær varðar. Áhersla er lögð á að það svigrúm verði nýtt til að tryggja að tekið verði fullt tillit til sjónarmiða sem ekki eru viðskiptalegs eðlis og að reglur um markaðsaðgang verði ásættanlegar.