Í gær kom út skýrsla sem Landbúnaðarháskóli Íslands vann fyrir Landssamband kúabænda. I skýrslunni er fjallað um þróun fjósgerða og mjaltatækni á Íslandi síðustu ár. Þar kemur fram að á síðustu fjórum árum hefur orðið mikil fækkun básafjósa – eða úr 86,2% í 70,1%. Á sama tíma hefur hlutfall legubásafjósa, þ.e. fjósa þar sem kýrnar ganga um lausar, hækkað umtalsvert eins og sjá má í meðfylgjandi töflu.

Fjósgerðir og mjaltatækni, þróun í fjölda á landsvísu.

	Árið 2005	Árið 2007
Fjósgerðir og mjaltatækni	Fjöldi	Fjöldi	Breyting
Básafjós með fötukerfi	16	13	-18,8%
Básafjós með rörmjaltakerfi	487	422	-13,3%
Básafjós með mjaltabás	85	69	-18,8%
Legubásafjós með mjaltabás	133	140	5,3%
Legubásafjós með mjaltaþjóni	39	74	89,7%
Annað	2	2	0,0%
Samtals	762	720	-5,5%

                                              

Í skýrslunni kemur jafnframt fram að legubásafjós með mjaltaþjónum eru að jafnaði með hæstu meðalnytina yfir landið og er það töluverð breyting frá árinu 2005, er básafjós með mjaltabás voru afurðamestu bú landsins. Næst afurðahæstu búin eru hefðbundin legubásafjós. Benda þessar niðurstöður til þess að mjaltaþjónabúin hafi náð þeirri afurðaaukningu sem búast má við þegar um tíðari mjaltir er að ræða en tvisvar á dag.

 

Fram kemur í skýrslunni að legubásafjós með mjaltaþjónum eru stærst en þar eru að meðaltali 59,9 árskýr. Er sú bústærð vafalítið enn nokkuð undir þeim mögulega árskúafjölda sem þessi fjós geta borið, enda flest mjaltaþjónafjós hönnuð fyrir 60-70 kýr.

 

Þrátt fyrir tiltölulega öra þróun varðandi breytingar á aðbúnaði gripa hér á landi undanfarin ár, þá er ljóst að enn eiga eftir að verða töluverðar breytingar á framleiðsluaðstæðum. Þannig má t.a.m. áætla að þrátt fyrir að um 45% íslenskra kúa séu í legubásafjósum og meðalnyt þeirra nokkuð hærri en annarra kúa, þá fer enn um 50% mjólkurframleiðslunnar hérlendis fram í eldri fjósum þar sem vitað er að vinnuaðstaðan er oftar en ekki afar erfið fyrir kúabændur.

 

Nánari uppl. gefur Snorri Sigurðsson í síma 843 5341.

 

Skýrsluna í heild sinni má nálgast hér.