Bandarísk yfirvöld ákváðu í lok síðustu viku að stöðva allan innflutning á nautgripakjöti frá Brasilíu. Var þetta gert til þess að tryggja matvælaöryggið í Bandaríkjunum, en í mars sl. komst upp um umfangsmikið svindl með kjöt og kjötvörur í Brasilíu. Síðan hafa bandarísk stjórnvöld tekið sýni úr mun hærra hlutfalli af innfluttu kjöti frá Brasilíu og hefur þessi aukna sýnataka leitt til þess að frá því í mars hefur 862 tonnum af innfluttu brasilísku kjöti verið fargað, þar sem kjötið var ekki talið hæft til neyslu.

Þetta mikla magn svarar til þess að 11% alls innflutts kjöts frá Brasilíu hafi verið óhæft til neyslu og er það auðvitað langum hærra hlutfall en nokkur stjórnvöld geta sætt sig við. Í fyrstu var yfirvöldum í Brasilíu gefið tækifæri til þess að ná tökum á ástandinu en lítið gerðist. Nú hafa svo bandarísku yfirvöldin misst þolinmæðina og þar til brasilísk stjórnvöld ná tökum á ástandinu verður engu kjöti frá Brasilíu hleypt inn til Bandaríkjanna/SS.