Beint í efni

Austurríki veðjar á hollustu mjólkur!

17.09.2012

Austurrísk stjórnvöld, ásamt þarlendum samtökum um sölu á austurrískum landbúnaðarvörum, hafa nú hleypt af stokkunum sameiginlegri þriggja ára herferð sem hefur sérstaka áherslu á hollustu mjólkur og verndandi áhrif mjólkur. Það sem er sérstakt við átakið er að það er fjármagnað að fullu af opinberum aðilum, þ.e. 50% af austurrískum stjórnvöldum og 50% greiðast svo af sérstökum átakssjóði Evrópusambandsins sem hefur það hlutverk að styðja verkefni sem upphefja sölu á heimaframleiddum vörum í stað innfluttra.

 

Þetta verkefni, sem hlotið hefur nafnið „Krönender Genuss“ hefur fengið 6 milljónir evra í styrk eða um 950 milljónir króna. Þetta er í þriðja skipti sem austurrískir kúabændur njóta stuðnings til átaksverkefnis með áþekka fjármögnun og er það eftirtektarverður árangur í þeirri samkeppni sem ríkir um fjárframlög. Þessum árangri geta þarlendir kúabændur þakkað sérstöku markaðsfélagi austurrískra bænda, Agrarmarkt Austria (AMA), sem hefur það eina hlutverk að upphefja sölu á austurrískum landbúnaðarvörum/SS.