Beint í efni

Áströlsk nautakjötsframleiðsla í vexti

13.11.2012

Framtíð ástralskrar nautakjötsframleiðslu er afar björt ef marka má nýja opinbera skýrslu þar í landi. Skýrsluhöfundar telja að virði nautakjötsframleiðslunnar muni aukast jafnt og þétt á komandi árum í takt við eftirspurn frá Asíu. Þannig telja þeir að árið 2025 verði verðmæti framleiðslunnar komið í 10 milljarða ástralskra dollara eða rúmlega 1.300 milljarða íslenskra króna og árið 2050 verði vermæti nautakjötsframleiðslunnar komið í um 15 milljarða ástralskra dollara eða  nærri 2.000 milljarða íslenskra króna. Um verulega aukningu er að ræða frá núverandi stöðu en heildarvelta nautakjötsframleiðslunnar í Ástralíu í dag er talin vera um 8-900 milljarðar íslenskra króna.

 

Forsætisráðherra Ástralíu, Julia Gillard, kynnti sjálf þessa skýrslu og er það til marks um mikilvægi landbúnaðar í Ástralíu að sjálfur forsætisráðherrann tekur að sér kynningu sem þessa. Julia sagði við kynninguna að markaðurinn í Asíu gæti ekki annað en vaxið og það hratt og sem dæmi um það væri talið að í Asíu árið 2025 verði flest miðstéttarfólk heimsins samankomið í einni heimsálfu. Gat hún þess einnig að hún teldi ástralska kúabændur í einstakri stöðu og að þrátt fyrir að í dag væri vægi nautakjötsins ekki nema um 3% af vergri landsframleiðslu þá gerði spá ríkisstjórnarinnar ráð fyrir því að þetta hlutfall fari í 12% árið 2025/SS.