Afurðafélagið Arla hefur nú tekið í notkun nýja afurðastöð í Senegal í Vestur-Afríku. Hin nýja afurðastöð er sérhæfð í pökkun á mjólkurdufti í neytendaumbúðir en mjólkurduftið kemur frá innleggjendum hjá félaginu í Evrópu. Vinnslugeta þessarar afurðastöðvar er í kringum 5 þúsund tonn á ári þ.e. duft úr um það bil 50 milljón lítrum af mjólk.

 

Í hinni nýju afurðastöð, sem er 14 þúsund fermetrar að stærð, er duftinu pakkað í litlar umbúðir sem eru sérhannaðar fyrir markaðinn í Senegal og nágrannalöndunum. Neytendur kaupa Arla-mjólkurduftpoka, blanda vatni út í og eru þá komnir með drykkjarmjólk. Í fréttatilkynningu frá félaginu segir að um afar mikilvægt skref sé að ræða fyrir félagsmenn Arla enda markaðurinn í Senegal stór en þar í landi búa um 14 milljónir. Mjólkurvörumarkaðurinn í Senegal hefur verið að vaxa undanfarin ár og er því spáð að næstu fimm árin muni hann stækka um 5% á ári/SS.