Beint í efni

Arla: G-mjólk til Kína á 700 kr líterinn!

09.04.2013

Arla Foods selur nú lífræna G-mjólk í Kína á 33 danskar krónur, eða tæplega 700 kr líterinn miðað við núverandi gengi. Eftirspurn eftir öruggum mjólkurafurðum þar eystra skýrir hið geipiháa verð, en traust kínverskra neytenda á þarlendri mjólkurframleiðslu beið mikinn hnekki í kjölfar melamín hneykslisins fyrir fáum árum. Vörur frá Arla njóta hins vegar trausts og því eru neytendur reiðubúnir að greiða mjög hátt verð fyrir þær.

Mjólkinni er pakkað í litlar fernur, minni en 1 ltr, þar sem ekki er sama hefð fyrir mjólkurneyslu í Kína og á Vesturlöndum. Um takmarkað magn er að ræða enn sem komið er, en Arla metur það svo að mikilir vaxtarmöguleikar séu á þessum markaði.

 

Síðan Arla sameinaðist þýska samlaginu MUH á síðasta ári, hefur samlag þess síðarnefnda í Pronsfeld, skammt vestan Frankfurt am Main í Þýskalandi verið nýtt til framleiðslu á G-mjólkinni, en það samlag er mjög öflugt á því sviði. Fyrsta kastið er það því þýsk mjólk sem flutt er til Kína, en Arla hefur lýst þeim ásetningi sínum að í framtíðinni verði lífrænar afurðir frá Danmörku og Svíþjóð einnig fluttar í austurveg./BHB

 

Landbrugsavisen 27. mars 2013