Það stefnir allt í að þýska stórsýningin Agritechnica, sem haldin er annað hvert ár og verður nú í nóvember í Hannover, verði afar áhugaverð nú sem fyrr enda stærsta sýning sinnar tegundar í heiminum. Í gær var svipt hulunni af helstu nýjungum sýningarinnar, en í ár eru 320 nýjungar sem hafa fengið úthlutað viðurkenningum fyrir nýjungar og þar af 2 með gullverðlaun og 27 með silfurverðlaun. Til þess að fá gullverðlaun þarf að vera um heimsfrumsýningu að ræða og til að fá silfurverðlaun um byltingarkennda uppfærslu eldri hönnunar eða mikið breytta útfærslu.

Í fréttatilkynningu sýningarinnar segir að þróunin í nýjungum þessa árs sýnir að áherslan er á sjálfvirkar stýringar og sjálfvirk landbúnaðartæki. Það er þó ekki einungis tölvubúnaður sem hefur verið þróaður heldur einnig almennur vélbúnaður og fékk t.d. John Deere og Kemper gullverðlaun fyrir nýtt skurðarborð á þreskivél fyrir maís sem bæði getur meðhöndlað kólfana en einnig stöngul plöntunnar í sömu ferðinni. Hin gullverðlaunin féllu Claas í skaut en fyrirtækið hefur þróað nýjan þreskibúnað sem kallast Cemos Auto Threshing og er hugbúnaður sem sér um allar stillingar við þreskinguna og þarf ökumaðurinn ekki að hugsa lengur um það/SS.