Niðurstöður afurðaskýrslna nautgriparæktarinnar fyrir októbermánuð hafa nú birst á nautgriparæktarsíðum bondi.is og má skoða þær nánar hér. Þegar yfirlitið var tekið saman höfðu borist skýrslur frá 94% búa sem skráð eru í skýrsluhaldið.

Niðurstöðurnar eru þær helstar að 22.259,5 árskýr mjólkuðu að meðaltali 5.345 kg síðustu 12 mánuðina. Hæsta meðalnyt var í Hraunkoti í Skaftárhreppi 8.355 kg, næsthæstu meðalafurðir voru á Kirkjulæk 2 í Fljótshlíð en þar voru þær 7.936 kg. Þriðja búið í röðinni er í Reykjahlíð á Skeiðum þar sem meðalnytin var 7.917 kg Þetta eru sömu búin og sátu efst í síðasta mánuði, röðin er þó aftur breytt, búin í Reykjahlíð og á Kirkjulæk hafa skipt um sæti.

Nythæsta kýrin síðustu 12 mánuðina var Fríða nr. 117 í Hraunkoti í Skaftárhreppi, nyt hennar á sama tíma var 12.073 kg en hún var í þriðja sæti á þessum lista í síðasta mánuði. Önnur kýrin í röðinni yfir nythæstu kýrnar síðastliðna 12 mánuði var Tíund nr. 279 í Leirulækjarseli í Borgarbyggð, en hún mjólkaði 11.972 kg og hin þriðja var Díana nr. 194 á Seljavöllum í Hornafirði.