Síðan laust fyrir síðustu mánaðamót hefur verið í gangi hér á naut.is könnun á því hversu mikið svarendur hennar endurrækta af túni. Könnunin hefur runnið sitt skeið á enda og voru svarendur 166, þar af voru 15 sem ekkert endurræktuðu.

Að jafnaði höfðu bændur hug á að endurrækta 8,5 ha sem þýðir að tæplega 1300 ha fara undir plóg þetta árið. Það jafngildir túnstærð 20-25 jarða. Niðurstöður vefkannananna sem þessarar ber ætíð að taka með nokkrum fyrirvara, en leyfi maður sér að yfirfæra þessar niðurstöður á öll kúabú, sem nú eru ca. 750 talsins, má ætla að kúabændur landsins endurrækti ríflega 6.000 hektara á ári. Ekki er þó með öllu loku fyrir það skotið að einhverjir svarendur stundi annars konar búskap en nautgriparækt, þannig að endurræktunin er ekki einskorðuð við kúabú.