Beint í efni

5,3 milljónir fyrir þarfanautið Playboy!

10.09.2011

Síðastliðinn þriðjudagur var sannkallaður happadagur hjá honum Jason Childs frá búinu Glenlands Stud sem er staðsett ekki langt frá Rockhampton á austurströnd Ástralíu. Jason hafði haldið á hinn árlega uppboðsmarkað „Glenlands Droughtmaster Sale“ í Gracemere, sem einnig er í nágrenni Rockhamton. Á markaðinum bauð hann til sölu marga álitlega nautgripi frá búi sínu, en búið er eingöngu með hið ástralska Droughtmaster kúakyn og þykir búið með þeim betri í framleiðslu kynbótagripa.
 
Alls náði Glenlands Stud búið að selja gripi á uppboðinu fyrir 1,2 milljónir ástralskra dollara þennan daginn eða sem nemur um 153 milljónum íslenskra króna. Á bak við þessa sölu voru 165 naut og var meðalverð þeirra því um 925 þúsund krónur! Lang hæsta verðið fékkst þó fyrir hið 18 mánaða gamla naut Glenlands D Playboy (P) sem vigtaði 806 kg á uppboðsdaginn. Þessi kappi fór á 42.500 dollara eða litlar 5,3 milljónir króna!
 
Sérstaða Droughtmaster kynsins er sú að það er sérlega hitaþolið og á ættir að rekja til Zebu kynsins. Vaxtargeta þess er ágæt og mjólkurframleiðslan einnig. Einstakt við kynið er snemmþroski, en kvígur geta borið allt niður í 14 mánaða aldur. Á myndinni má sjá nautið Playboy með hinum ánægða Jason Childs/SS.