Beint í efni

4,4% framleiðsluaukning nautakjöts

19.02.2013

Landssamtök sláturleyfishafa hafa nú tekið saman nýjar framleiðslu- og sölutölur kjötgreina fyrir janúar en í samantektinni kemur fram að sala á nautgripakjöti í mánuðinum var töluvert meiri en hún var í sama mánuði í fyrra en að ársfjórðungssalan, þ.e. salan síðustu 3 mánuði, hafi þó verið 0,7% minni en sömu mánuði árið áður. Árssalan, þ.e. salan sl. 12 mánuði, er nú 4.140 tonn sem er aukning um 4,7% miðað við síðustu 12 mánuðina þar á undan.

 

Heildarframleiðsla nautgripakjöts sl. 12 mánuði var 4.137 tonn, en framleiðslan í mánuðinum var 416 tonn. Er ársframleiðsla nautakjöts enn verulega mikið meiri en fyrir ári síðan og nemur framleiðsluaukningin 4,4%. Sé horft til sundurliðunar á sölu nautgripakjöts í mánuðinum var sem fyrr mest sala í ungnautakjöti eða 231 tonn og á 12 mánaða grunni nemur ungnautakjötssalan 2.384 tonnum eða 57,6% af heildarsölunni. Sala á kýrkjöti síðustu 12 mánuði var 1.508 tonn eða sem nemur 36,4% af heildarsölunni.

 

Sé litið til annarra kjöttegunda kemur fram í samantektinni að heildarsalan á landinu öllu hefur aukist sl. 12 mánuði um heil 6,2%. Mest er sem fyrr salan á alifuglakjöti eða 7.915 tonn (31,8%) og þar á eftir kemur lamba- og kindakjöt með 6.613 tonn eða 26,5% markaðshlutdeild/SS