Tuttugasti og sjötti fundur stjórnar LK starfsárið 2019-2020 var haldinn sunnudaginn 15.desember kl. 20:30 í gegnum fundarsíma.

Mætt eru: Arnar Árnason formaður, Jónatan Magnússon ritari, Bessi Freyr Vésteinsson og Rafn Bergsson meðstjórnendur. Herdís Magna Gunnarsdóttir varaformaður boðar forföll og Linda Björk Ævarsdóttir situr fundinn í hennar stað. Jóhanna María Sigmundsdóttir framkvæmdarstjóri situr fundinn og jafnframt ritar fundargerð.

Formaður setur fundinn og gengur til dagskrár:

1. Veðurofsi og afleiðingar hans. Formaður ræðir stöðuna eftir undanfarna daga þar sem veður hefur haft slæm áhrif á bæði mjaltir og mjólkurflutninga. Einhverjir bændur hafa þurft að hella niður mjólk, aðrir lentu í vandræðum vegna rafmagnsleysis sem hafði áhrif á kýr og getur haft langtímaáhrif. Formaður opnar á umræður um hvernig LK eigi að bregðast við.
2. Heildargreiðslumark 2020. Búið er að samþykkja heildargreiðslumark hjá SAM og hefur sent til Búnaðarstofu til afgreiðslu. Tillaga Búnaðarstofu verður kynnt á fundi framkvæmdarnefndar búvörusamninga á morgun. Opnað er á umræður um mögulegar tillögur og niðurstöðu fyrir heildargreiðslumark.
3. Umræða um rafmagnsöryggi. Formaður ræðir möguleikann á því að LK hafi einhverja forgöngu fyrir kaup bænda á lausnum til að bregðast við vanda svipuðum og skapaðist á síðustu dögum fyrir bændur og geta þannig komið í veg fyrir meiri skaða. Formaður leggur til að LK leiti ráðgjafar í þessum efnum og reyni að taka þétt utan um verkefnið. Í svona málum getur kraftur fjöldans oft skipt sköpum en á sama tíma getur þetta verið flókið verkefni og þungt í framkvæmd. Opnað er á umræður. Formaður og framkvæmdarstjóri munu þreifa sig áfram um tillöguna.
4. Ályktun frá stjórn LK – heildarendurskoðun, uppbygging, hafa grunnstoðir í lagi, full þörf á að huga að þessum málum, það þarf að vinna að málunum, þetta má ekki falla í gleymsku fram að næsta veðri og skaða, hvatning til stjórnvalda. Allt tengist þetta, dreifbýli og minni þéttbýli, rafmagn og fjarskipti, kominn ljósleiðari á marga staði en fjarskipti voru úti sem gerðu að verkum að enginn gat látið vita af sér eða athugað með aðra. Lögbundið hlutverk RÚV er oft á milli tannanna á fólki, svo þegar fréttatímar voru þá voru þeir ekki að skila upplýsingum til þeirra sem voru utan alls annars sambands, fólk fékk ekki að frétta af stöðunni í kringum sig t.d. Það verður að nýta þessa miðla rétt ef nýting þeirra er skilgreind sem nauðsyn eða þörf þeirra viðurkennd.
5. Önnur mál.
   Engin mál eru að brenna inni en framkvæmdarstjóri biður stjórn um að senda punkta vegna þeirra mála sem hafa verið áframsend á þau ef einhverjir eru.
   Loftslagsmálin voru rædd á vinnudegi og nú þarf að leggja drög að næstu skrefum með efnið sem komið er. Annar stjórnarfundur verður á næstu dögum til að taka fyrir þau verkefni.

Fleira er ekki á dagskrá og umræður tæmdar.

Fundi slitið kl.21:21

Jóhanna María Sigmundsdóttir, framkvæmdarstjóri