Beint í efni

2,1% söluaukning nautakjöts

29.04.2013

Landssamtök sláturleyfishafa hafa nú tekið saman nýjar framleiðslu- og sölutölur kjötgreina fyrir mars en í samantektinni kemur fram að sala á nautgripakjöti í mánuðinum var töluvert minni en hún var í sama mánuði í fyrra og nam sölusamdrátturinn 16,4% miðað við í fyrra. Hins vegar er ársfjórðungssalan, þ.e. salan síðustu 3 mánuði, ekki nema 0,1% minni en en sömu mánuði árið áður og þar sem vel gekk með sölu nautakjöts á seinni hluta síðasta árs er árssalan, þ.e. salan sl. 12 mánuði, enn vel yfir 12 mánuðunum þar á undan. Alls nam salan síðustu 12 mánuði 4.110 tonnum sem er aukning um 2,1% miðað við síðustu 12 mánuðina þar á undan.
 
Heildarframleiðsla nautgripakjöts sl. 12 mánuði var 4.114 tonn, en framleiðslan í mánuðinum var 291tonn. Er ársframleiðsla nautakjöts enn verulega mikið meiri en fyrir ári síðan og nemur framleiðsluaukningin 2,4%. Sé horft til sundurliðunar á sölu nautgripakjöts í mánuðinum var sem fyrr mest sala í ungnautakjöti eða 159 tonn og á 12 mánaða grunni nemur ungnautakjötssalan 2.371 tonni eða 57,7% af heildarsölunni. Sala á kýrkjöti síðustu 12 mánuði var 1.493 tonn eða sem nemur 36,3% af heildarsölunni.
 
Sé litið til annarra kjöttegunda kemur fram í samantektinni að heildarsalan á landinu öllu hefur aukist sl. 12 mánuði um 3,5%. Mest er sem fyrr salan á alifuglakjöti eða 7.902 tonn (32,0%) og þar á eftir kemur lamba- og kindakjöt með 6.628 tonn eða 26,8% markaðshlutdeild/SS.