Vegna mikillar framleiðslu mjólkur og heldur minni sölu á sama tíma hafa mjólkurafurðir verið að safnast upp í nokkrum löndum. Helst er þar á ferðinni duft og smjör en einnig ostar. Ostar geymast reyndar ekkert óskaplega vel og því keppast margir framleiðendur við að koma þeim á markað með tilheyrandi undirboðum. Vegna þessa hefur Evrópusambandið stofnað til sérstaks geymslusjóðs, sem löndin geta sótt í og óskað eftir að fá stuðning til þess að geyma osta ef það stefnir í óefni og undirboð.

 

Öll aðilarlöndin gátu sótt um stuðning til þess að setja ostinn á lager en einungis fimm lönd sóttu um, en umsóknartímabilið var frá 19.-25. október sl. Það voru Stóra-Bretland, Írland, Svíþjóð, Ítalía og Holland. Önnur lönd töldu sig ekki þurfa að nýta sér þennan möguleika. Alls geta löndin fengið 2.100 krónur í stuðning fyrir hvert tonn sem er tekið tímabundið af markaði með þessum hætti en samþykkt var að taka 19 þúsund tonn til hliðar í þessu átaki. Ostarnir mega fyrst koma aftur inn á markaðinn eftir 60-120 daga/SS.