Samkvæmt nýútkomnu yfirliti Samtaka afurðastöðva í mjólkuriðnaði var sala á fitugrunni 144,1 milljónir lítra síðustu 12 mánuði (október 2016 – septeber 2017) og 131,9 milljónir lítra á próteingrunni. Það berast því enn jákvæðar fréttir af sölunni innanlands enda söluaukning á 12 mánaða tímabili, miðað við 12 mánaða tímabilið þar á undan, bæði þegar horft er til fitu- og próteinsölu.

Á sama tíma hefur hins vegar innvigtun mjólkur dregist saman um 1,8% og var innvegin mjólk síðustu 12 mánuði 149,2 milljónir lítra. Sé einungis litið til þessa árs þá er innvigtunin nú í lok september komin í tæplega 114,9 milljónir lítra en var á sama tíma í fyrra rúmlega 116,0 milljónir lítra. Alls nemur framleiðslumunurinn 1,2 milljón lítrum á milli ára sem svarar til 1,0% samdráttar i innvigtun það sem af er þessu ári í samanburði við sama tímabil árið 2016. Innvigtunin núna í september var þó meiri sem nam rúmlega 300 þúsund lítrum í samanburði við september í fyrra, sem etv. bendir til þess að framleiðslan sé á ný að taka við sér/SS.