29. júní 2021

Loftslagsvænn landbúnaður stækkar

Þessa dagana er auglýst eftir 15 búum í nautgriparækt til þess að taka þátt í „Loftslagsvænum landbúnaði,“ verkefni sem miðar að því að minnka losun gróðurhúsalofttegunda og auka kolefnisbindingu.

Loftslagsvænn landbúnaður er hluti af aðgerðaáætlun stjórnvalda í loftslagsmálum.

Ráðgjafarmiðstöð landbúnaðarins, Skógræktin og Landgræðslan undirrituðu samning fyrr í mánuðinum við atvinnuvega- og nýsköpunarráðuneytið og umhverfis- og auðlindaráðuneytið um að stækka verkefnið og bjóða fimmtán búum í nautgriparækt að hefja þátttöku í haust. 

Nýir þátttakendur fá fjölþætta ráðgjöf

Þátttakendur gera skriflega aðgerðaáætlun fyrir búreksturinn, hrinda  loftslagsmarkmiðum í framkvæmd og eru virkir þátttakendur í vegferð landbúnaðarins að loftslagsvænum lausunum. Þátttakendur fá heildstæða ráðgjöf, fræðslu og aðhald frá RML, Landgræðslunni og Skógræktinni. Auk þess fá búin þátttökustyrk, styrk til efnagreininga og þegar líður á verkefnið aðgerða- og árangurstengdar greiðslur.

Í dag eru 27 sauðfjárbú í verkefninu, öll í gæðastýrðri sauðfjárrækt, staðsett víðs vegar á landinu. Öll hafa sett sér aðgerðaáætlun og eru byrjuð að vinna að loftslagsvænum markmiðum. Bændur í nautgriparækt er boðnir velkomnir í hópinn.

Hafið samband við Ráðgjafarmiðstöð landbúnaðarins

Áhugasamir um þátttöku geta sótt um á vefsíðu RML, www.rml.is, eða haft samband við Berglindi Ósk Alfreðsdóttur, verkefnastjóra, í síma 516-5000 eða á berglind@rml.is

Auglýsing - pdf