31. ágúst 2020

Leiðbeiningar fyrir göngur og réttir vegna COVID-19 hafa verið uppfærðar

Búið er að uppfæra leiðbeiningar fyrir göngur og réttir vegna COVID-19.  Helstu breytingar eru þær að nú er komin heimild til að veita almenna undandþága vegna nándarmarka í fjallaskálum þannig að heimilt verður að viðhafa 1 metra á milli einstaklinga í fjallaskálum, þegar því verður ekki viðkomið að halda 2 metra fjarlægð. Eins er heimild til undanþágu frá fjöldatakmörkun vegna réttarstarfa þannig að fleiri en 100 manns geti tekið þátt.

Þetta kemur fram í tilkynningu Landssamtaka sauðfjárbænda (LS), en samtökin taka við umsóknum varðandi undanþágur frá fjöldatakmörkunum.

Leiðbeiningar vegna gangna og rétta vegna COVID-19 HÆTTUSTIG almannavarna

Tilkynning LS fer hér á efir:

„Þann 26.08.2020 veitti Heilbrigðisráðuneytið undanþágu frá 1. mgr. 4. gr. auglýsingar um takmörkun á samkomum vegna farsótta (792/2020). Þannig er heimilt að viðhafa 1 metra á milli einstaklinga í fjallaskálum, þegar því verður ekki viðkomið að halda 2 metra fjarlægð. Minnt er á ákvæði 8. gr. auglýsingarinnar um takmörkun á samkomum vegna farsótta, um þrif og sótthreinsun almenningsrýma og jafnframt á einstaklingsbundnar sóttvarnir.

Þá er búið að opna fyrir almenna undanþágu fyrir fjöldatakmörkun fyrir rétta.

Þann 28.08.2020 veitti Heilbrigðisráðuneytið almenna undanþágu fyrir fjöldatakmörkun fyrir réttarstörf á á grundvelli 10. gr. auglýsingar nr. 792/2020, að því tilskildu að farið sé eftir tilmælum sóttvarnarlæknis hér að neðan. Um slíka undanþágu skal sækja til Landssamtaka sauðfjárbænda á netfangið unnsteinn@bondi.is.  Minnt er á ákvæði 8. gr. auglýsingarinnar, um þrif og sótthreinsun almenningsrýma og jafnframt á einstaklingsbundnar sóttvarnir.

  • Haldinn sé listi yfir þá einstaklinga sem koma í réttina með upplýsingum sem nota má til að hafa samband við viðkomandi gerist þess þörf.
  • Upplýsingar um sóttvarnaráðstafanir og 2 metra reglu eru sýnilegar.
  • Handspritt og handþvottaaðstaða til staðar.
  • Ef matvælaþjónusta er veitt,  að matvæli séu afgreidd í innpökkuðu formi og kaffi sé hellt í bolla, ekki sjálfsafgreiðsla og að starfsfólk sem afgreiðir matvæli haldi 2 metra fjarlægð frá gestum.
  • Að talning inn og út af svæði sé skilvirk.
  • Að lögregla umdæmis  og umdæmislæknir sóttvarna séu  upplýst um þessa undanþágu.
  • Að ábyrgðarmaður réttarstarfa sendi fólk sem sýnir einhver flensueinkenni tafarlaust af vettvangi og fylgist með að starfsmenn og gestir virði 2 metra reglu.   

Landssamtök sauðfjárbænda taka á móti umsóknum um undanþágur fyrir fjöldatakmörkun fyrir réttarstörf og afgreiða þær í samráði við Embætti landlæknis og Heilbrigðisráðuneytið.  Nánari upplýsingar veitir framkvæmdastjóri Landssamtaka sauðfjárbænda, Unnsteinn Snorri Snorrason, í síma 899 4043 og í netfanginu, unnsteinn@bondi.is.“