Búnaðarsambönd
Um búnaðarsambönd
Í öllum sveitum landsins hafa frá því á 19. eða 20. öld lengst af verið starfandi hreppabúnaðarfélög. Þau hafa myndað búnaðarsambönd sem hvert um sig nær yfir eina eða fleiri sýslur. Á síðustu árum hafa víða orðið breytingar og nú er bakgrunnur búnaðarsambandanna misjafn. Sums staðar eiga búgreinafélög aðild að búnaðarsambandi og annars staðar eiga bændur beina aðild að búnaðarsambandi. Einnig þekkist að búnaðarsambönd hafi myndað samtök sem ná til stærra svæðis sbr. á Vesturlandi þar sem þrjú búnaðarsambönd mynda Búnaðarsamtök Vesturlands og á Norðurlandi eystra, þar sem þrjú búnaðarsambönd hafa sameinast um ráðgjafaþjónustu. Helstu verkefni búnaðarsambanda eru að veita faglega ráðgjöf um landbúnað og þau eru jafnframt stéttarfélög bænda. Flest þeirra veita sérhæfða bókhaldsþjónustu og annast búfjársæðingar. Starfsmenn búnaðarsambanda sem annast leiðbeiningaþjónustu kallast héraðsráðunautar. Búnaðarsamböndin, sem eru fimmtán, starfa skv. búnaðarlögum frá 4. júní 1998.
Skipting starfssvæða búnaðarsambandanna. Mynd: Jóhannes Hr. Símonarson.