20. ágúst 2018

Nýsköpunarstarf í sveitum - Gríptu boltann!

Framleiðnisjóður landbúnaðarins og Ráðgjafarmiðstöð landbúnaðarins standa í ágústmánuði fyrir fundaherferðinni „Gríptu boltann“ sem hefur það markmið að hvetja til nýsköpunar í sveitum. 

Aðalfyrirlesari fundanna er Guðmundur Þórður Guðmundsson, landsliðsþjálfari í handbolta, og mun hann flytja erindi sem ber nafnið „Leiðin til sigurs“. Erindið fjallar um árangursríka markmiðssetningu og hvað þarf til að ná framúrskarandi árangri. Fjallað er um uppbyggingu liðsheildar, samskipti og innleiðingu breytinga. 

Að auki verða fengnir til leiks reynsluboltar í sölu vöru og þjónustu beint frá býli. Þeir munu miðla af reynslu sinni varðandi þróun og markaðssetningu.

Þá verður erindi frá ráðunautum Ráðgjafarmiðstöðvar landbúnaðarins varðandi ýmsa sjóði sem hægt er að sækja styrki í, ásamt því hvernig umsóknarferlið fer fram.

Fyrsti fundur verður haldinn í Víðihlíð, Húnaþingi vestra miðvikudagskvöldið 22. ágúst klukkan 20:00. Fundirnir verða öllum opnir og eru sem flestir hvattir til að mæta.

Fundaplan

mið. 22. ágúst, Félagsheimilið Víðihlíð í V-Hún. kl. 20.00
fim. 23. ágúst, Sauðfjársetrið á Ströndum, kl. 13.00
fös. 24. ágúst, Dalabúð í Búðardal, kl. 13.00
þri. 28. ágúst, Félagsheimilið Hofsósi, kl. 13.00.