15. október 2012

Niðurstöður afurðaskýrslna nautgriparæktarinnar í september

Niðurstöður afurðaskýrslnanna í nautgriparæktinni við lok september 2012, hafa verið reiknaðar og birtar á nautgriparæktarsíðunum á vef okkar. Nánar má skoða þær hér. Þegar yfirlitið var búið til, á miðnætti hinn 10. október, höfðu borist skýrslur frá 93% þeirra 594 búa sem skráð eru í skýrsluhaldið.

Helstu niðurstöðurnar eru þær að 21.614,2 árskýr mjólkuðu að meðaltali 5.618 kg sl. 12 mánuði, sem er 15 kg lægri nyt en reiknaðist í síðasta uppgjöri. Ástæður þess geta verið ýmsar en ef til vill hefur hretið sem gekk yfir í september sín áhrif og einnig getur verið að þurrkarnir í sumar, sem drógu úr grænfóðuruppskeru hafi sitt að segja, en rétt er að fullyrða varlega um þá hluti.

Hæsta meðalnytin við lok september var í Miðdal í Kjós, 7.815 kg á árskú en það bú var nr. 3 á listanum í ágúst. Næst á eftir kom búið á Hraunhálsi í Helgafellssveit á Snæfellsnesi en meðalnytin þar var 7.766 kg á árskú. Þriðja búið í röðinni var á Hóli í Sæmundarhlíð í Skagafirði en þar var samsvarandi nyt 7.762 kg en þar voru hæstar meðalafurðir í ágúst. Sömu bú voru í þrem efstu sætunum í ágúst og september en röðin breyttist. Á 19 búum fór meðalnytin í 7.000 kg eftir árskú og þar yfir en á 22 búum í mánuðinum á undan.

Nythæsta kýrin á síðustu 12 mánuðum var hin sama og næstu átta mánuði á undan, Blíða nr. 1151 í Flatey á Mýrum, A-Skaft., nyt hennar síðastliðna 12 mánuði var 13.385 kg. Önnur kýrin í röðinni yfir nythæstu kýrnar síðastliðna 12 mánuði var Blúnda nr. 335 í Leirulækjarseli á Mýrum í Borgarbyggð, en hún mjólkaði 13.285 kg. og var í fjórða sæti á þessum lista í ágúst. Hin þriðja á listanum í septemberlok 2012 var Vitra nr. 622 í Reykjahlíð á Skeiðum í Árnessýslu, sama kýr og í síðasta mánuði. Hún mjólkaði 13.046 kg sl. 12 mánuði. Alls náðu 10 skýrslufærðar kýr að fara yfir 11.000 kg á síðustu 12 mánuðum en þær voru 16 í ágúst. Af þessum 10 mjólkuðu 4 yfir 12.000 kg og þrjár yfir 13.000 kg en engin náði yfir 14.000 að þessu sinni.

Niðurstöður skýrsluhaldsins