06. nóvember 2018

Íslenskt - gjörið svo vel

Samtök iðnaðarins, Samtök atvinnulífsins, Samtök verslunar og þjónustu og Bændasamtök Íslands hafa tekið höndum saman í nýju átaksverkefni sem hefur hlotið nafnið „Íslenskt – gjörið svo vel“.

Tilgangur verkefnisins er að efla vitund Íslendinga á íslenskum vörum og auka stolt þeirra. Reglulega hefur verið farið í herferðir sem þessar undanfarin ár en til viðbótar við hefðbundnar leiðir verða landsmenn hvattir til að mæla með sínum uppáhaldsvörum fyrir erlenda gesti.

Sigurður Eyþórsson, framkvæmdastjóri Bændasamtaka Íslands, segir að full þörf sé á að fara í átak þar sem vakin er athygli á uppruna íslenskra vara. ,,Bændur leggja mikla áherslu á að neytendur séu vel upplýstir um þær vörur sem þeir kaupa. Þeir eiga rétt á að vita hvaðan maturinn kemur, hvort heldur sem hann er seldur í verslunum, á veitingastöðum eða í mötuneytum. Við erum stolt af íslenskum landbúnaðarvörum og viljum gjarnan undirstrika uppruna þeirra með skýrum merkingum,“ segir Sigurður.

Herferðin „Íslenskt – gjörið svo vel“ er ekki einvörðungu bundin við mat eða búvörur því allar íslenskar vörur eru undir; ýmsar iðnaðarvörur, s.s. skartgripir, fatnaður, bækur, listaverk, húsgögn og fleira.

Með hverju mælir þú við þína gesti?

Íslendingar eru gestrisin þjóð og hið nýja átak gefur landsmönnum kost á að tilnefna þær vörur sem þeir myndu mæla með við erlenda gesti. Á vefsíðunni www.gjoridsvovel.is eru íslenskar vörur í aðalhlutverki. Aðilar verkefnisins hafa safnað þar saman íslenskum vörum úr ýmsum áttum og bjóða Íslendingum að setja saman lista af þeim vörum sem þeir telja að enginn gestkomandi megi missa af. Þeim listum er hægt að deila á samfélagsmiðlum.

Allir sem framleiða íslenskar vörur geta tekið þátt

Fyrirtæki sem framleiða eða selja íslenskar vörur geta tekið þátt í átakinu. Miðað er við vörur sem uppfylla þau skilyrði sem fram koma í fánalögum. Þau fyrirtæki og þeir framleiðendur sem taka þátt í átakinu fá aðgang að myndmerki þess og geta nýtt það á umbúðir, heimasíður, samfélagsmiðla eða annað kynningarefni sitt.