24. ágúst 2017

Hver vinnur til Embluverðlaunanna?

Embluverðlaunin, samnorræn matarverðlaun, verða afhent síðar í dag í Kaupmannahöfn í fyrsta sinn. Athöfnin er haldin í tengslum við matarhátíðina Copenhagen Cooking og stóra ráðstefnu á vegum danska landbúnaðarráðuneytisins, “Better food for more people”.

Með Embluverðlaununum er ætlunin að upphefja norrænar matarhefðir og þann menningararf sem Norðurlandaþjóðirnar búa að. Jafnframt að beina kastljósinu að þeim framleiðendum sem skara fram úr, stunda nýsköpun eða eru brautryðjendur í sínu fagi.

Embluverðlaunin eru samstarfsverkefni allra bændasamtaka Norðurlandanna sem eru í NBC, samtökum norrænna bændasamtaka. Að auki taka Færeyingar þátt og Álandseyjar hafa jafnframt sína fulltrúa í keppninni. Norræna ráðherranefndin er einn af bakhjörlum Embluverðlaunanna.

Alls er keppt í sjö flokkum og Ísland sendi eftirfarandi tilnefningar í þá alla:

Mat fyrir börn og ungmenni 2017
Vakandi

Mataráfangastaður Norðurlanda 2017
Siglufjörður

Matarfrumkvöðull Norðurlanda 2017
Pure Natura

Matvælaiðnaðarmaður Norðurlanda 2017
Saltverk

Kynningarherferð / Matarblaðamaður Norðurlanda 2017
Icelandic Lamb

Norðurlandaverðlaun fyrir mat fyrir marga 2017
Eldum rétt

Hráefnisframleiðandi Norðurlanda 2017
Friðheimar

Dómnefndir voru að störfum í gærdag en hver þjóð lagði til þrjá dómara. Fyrir Íslands hönd sátu í dómnefnd Guðrún Tryggadóttir bóndi í Svartárkoti, Bjarni Gunnar Kristinsson matreiðslumeistari í Hörpu og Brynja Laxdal framkvæmdastjóri Matarauðs Íslands.

Seinnipartinn í dag kemur í ljós hverjir vinna til verðlauna en verðlaunaafhendingin fer fram í ráðhúsinu í Kaupmannahöfn að viðstöddu fjölmenni, meðal annars ráðherrum, borgarstjóra Kaupmannahafnar og Marie prinsessu. Formenn norrænu bændasamtakanna og flestir þeir sem tilnendir eru verða einnig við athöfnina.