04. mars 2013

Handverkskonur milli heiða og Laxárdalur II hlutu Landbúnaðarverðlaunin

Landbúnaðarverðlaunin 2013 voru veitt við setningu búnaðarþings á sunnudaginn var. Að þessu sinni hlutu bændurnir í Laxárdal II og handverkshópurinn Handverkskonur milli heiða verðlaunin. Það var Steingrímur J. Sigfússon, atvinnuvega- og nýsköpunarráðherra sem afhenti verðlaunin.

Í Laxárdal II búa hjónin María Guðný Guðnadóttir og Hörður Harðarson félagsbúi ásamt syni sínum Björgvini Þór og tengdadóttur, Petrínu Þórunni Jónsdóttur auk barna þeirra. Í Laxárdal er rekið stórt svínabú sem hefur þá sérstöðu að stór hluti fóðurs er heimafenginn. Um 75 prósent af öllu fóðri sem svínin í Laxárdal fá er ræktað í Gunnarsholt þar sem Laxárdalsbændur leigja um 300 hektara lands undir kornrækt, einkum bygg. Bændur í Laxárdal hljóta Landbúnaðarverðlaunin fyrir myndarskap og dugnað, framsýni og nýsköpun í íslenskum landbúnaði.

Handverkskonur milli heiða eru félagskapur sem stofnaður var í mars 1992 af konum í Bárðardal, Ljósavatnshreppi og af bæjum í Reykdælahreppi vestan Fljótsheiðar. Strax í næsta mánuði bættust konur í Hálshreppi við og þá varð nafnið á félaginu; Handverkskonur milli heiða. Tildrögin að þessum félagsskap má rekja til þess að eftirspurn var eftir minjagripum – vörum úr heimabyggð, ekta íslenska minjagripi og annað handverk. Það var úr að nokkrar konur tóku sig saman um að láta reyna á það hvort vilji væri fyrir því að stofna félagsskap til að vinna að íslensku handverki og selja það við Goðafoss. Nú er félagssvæðið öll Þingeyjarsveit.

Árið 1993 stofnuðu Handverkskonur milli heiða hlutafélagið Goðafossmarkað ehf. sem annast sölu á vörum handverkskvenna og fleira fólks úr héraði. Hlutafélagið er að stærstum hluta í eigu félagskvenna. Nú 21 ári síðar eru Handverkskonur milli heiða enn að auka og bæta framleiðsluna. Fjölbreytnin vex og verslunin er vinsæll áningastaður ferðamanna vegna þeirra fjölbreyttu og fallegu vöru sem fæst á Goðafossmarkaði. Handverkskonur hljóta Landbúnaðarverðlaunin fyrir dugmikið starf við útbreiðslu íslensks handverks og atvinnuþróun í dreifbýli.