28. febrúar 2014

Búnaðarþing 2014 og Matarhátíð í Hörpu

Búnaðarþing Bændasamtaka Íslands verður formlega sett við hátíðlega athöfn, laugardaginn 1. mars, klukkan 12.30 í salnum Silfurbergi í Hörpu. Kokkakeppni matarhátíðarinnar Food & Fun fer fram í kjölfarið í salnum Norðurljósum. Á sama tíma verður iðandi mannlíf á matarmarkaði Búrsins, þar sem á fimmta tug smáframleiðenda bjóða fram sínar vörur.

Allir eru velkomnir á setningarathöfn Búnaðarþings sem hefst með léttri hádegishressingu í boði íslenskra bænda og fyrirtækja þeirra. Kór Menntaskólans við Hamrahlíð syngur, landbúnaðarverðlaunin verða veitt og Magni Ásgeirsson tekur lagið. Sindri Sigurgeirsson, formaður BÍ, setur þingið og Sigurður Ingi Jóhannsson, sjávarútvegs- og landbúnaðarráðherra, flytur ávarp.

Food & Fun hefur löngum verið einn af hápunktum ársins í íslenskri veitingaflóru. Nokkrir gestakokkar keppa sín á milli um titilinn Food & Fun matreiðslumaður ársins í Hörpunni. Veitingastaðirnir sem taka þátt í hátíðinni munu bjóða gestum að bragða á dýrindis mat sem gerður er úr hágæða íslensku hráefni. Kokkakeppnin er haldin á milli kl. 13.00 og 16.00.

Ljúfmetisverslunin Búrið heldur stærsta matarmarkað landsins, þar sem bændur, framleiðendur og neytendur bera saman bækur sínar og stunda viðskipti. Einkunnarorð Vetrarmarkaðarins eru „Uppruni, umhyggja og upplifun“ og öruggt að allir finna eitthvert góðmeti við sitt hæfi. Vetrarmarkaður Búrsins verður opinn milli kl. 11.00-17.00, bæði laugardag og sunnudag.

Margt um að vera í Hörpu sama dag
Á laugardeginum verður ýmislegt um að vera í Hörpunni. Vélasalar sýna dráttarvélar og annan búnað, Landbúnaðarháskóli Íslands kynnir spennandi námsleiðir og Samtök ungra bænda kynna sína starfsemi, hamborgarabíllinn Tuddinn verður ekki langt undan og Meistarafélag kjötiðnaðarmanna mætir með grillvagn sauðfjárbænda kl. 14 á laugardag.

Þingað verður á Hótel Sögu
Þinghaldi Búnaðarþings verður fram haldið í Bændahöllinni sunnudaginn 2. mars og fram á þriðjudaginn 4. mars. Ræður og upplýsingaefni um handhafa landbúnaðarverðlauna verða settar á vefinn bondi.is að athöfn lokinni. Málaskrá og framvinda mála verður jafnframt lögð fram á bondi.is þegar þingið hefst.