27. október 2012

Aukabúnaðarþing fjallar um leiðbeiningaþjónustu

Boðað hefur verið til aukabúnaðarþings mánudaginn 29. október vegna breyt­inga á leiðbeininga­þjónustu land­­búnaðar­ins. Verður þingið haldið í framhaldi af samþykkt síðasta búnaðar­þings, þar sem ályktað var um grundvallarbreytingar á starfseminni.

Leiðbeiningaþjónusta á vegum samtaka bænda byggir á um 100 ára gömlum grunni en hefur tekið miklum breytingum á hverjum tíma í takti við aðstæður í landbúnaði. Síðustu meiriháttar breytingar voru gerðar árið 1998. Þá var markmiðið að leiðbeiningastöðvar væru ekki með færri en þrjá ráðunauta í starfi.

Á árinu 2010 var leitað til systursamtaka BÍ í Danmörku til að vinna úttekt á starfseminni og lögðu þau til að gerðar yrðu á henni grundvallar breytingar. Eftir búnaðarþing í mars síðastliðnum var næsti áfangi að móta hina nýju starfsemi. Var Ágúst Þorbjörnsson hjá ráðgjafarfyrirtækinu Framsækni ehf. ráðinn verkefnisstjóri og kynnti hann tillögur sínar fyrir formanna­fundi aðildarfélaga BÍ í september. Tillögur hans eru nú til umræðu og mun stýrihópur, sem stjórn BÍ skipaði, leggja endanlegar tillögur sínar fyrir búnaðarþing.

Í kjölfar þeirrar úttektar hefur farið fram mikil vinna sem miðar að því að flytja leiðbeiningaþjónustuna í sérstakt félag með eigin stjórn sem sem starfi sjálfstætt en verði eigi að síður í eigu bænda.