20. nóvember 2019

Atkvæðagreiðslu um samkomulag um starfsskilyrði nautgriparæktar frestað

Bændur og ríkisvald skrifuðu undir samkomulag um endurskoðun á samningi um starfsskilyrði nautgriparæktar þann 25. okt. síðastliðinn. Bændur og ríkisvald skrifuðu undir samkomulag um endurskoðun á samningi um starfsskilyrði nautgriparæktar þann 25. okt. síðastliðinn.

Atkvæðagreiðslu um samkomulag um endurskoðun á samningi um starfsskilyrði nautgriparæktar frá 19. febrúar 2016, sem undirritað var 25. október sl. og fara átti fram 20.- 27. nóvember, hefur verið frestað. Bændasamtök Íslands boða hér með að nýju til atkvæðagreiðslu um samkomulagið.

Atkvæðagreiðslan mun standa yfir frá kl. 12:00 á hádegi þann 27. nóvember til kl. 12:00 á hádegi þann 4. desember.

Ákvörðun um frestun var tekin í kjölfar umræðu og áskorunar 340 kúabænda um að samninganefndirnar settust aftur að samningaborði. Fundur er áætlaður með landbúnaðarráðherra í hádeginu í dag þar sem samningsaðilar munu ræða stöðuna.

Kosningarétt hafa félagsmenn í Bændasamtökum Íslands sem eru jafnframt með virkt bú í skýrsluhaldi fyrir nautgriparækt. Þá hafa félagsmenn í Landssambandi kúabænda einnig kosningarétt.

Atkvæðagreiðslan mun fara fram með rafrænum hætti og verður aðgengileg á vef Bændasamtakanna www.bondi.is.

Hægt verður að kanna aðild að kjörskrá í gegnum rafrænan aðgang frá kl. 12:00 á hádegi þann 20. nóvember til kl. 12:00 á hádegi 25. nóvember. Allar nánari upplýsingar um framkvæmd atkvæðagreiðslunnar er að finna á vef Bændasamtakanna, www.bondi.is

Í kjörstjórn sitja Elías Blöndal Guðjónsson formaður, Guðbjörg Jónsdóttir og Guðrún Vaka Steingrímsdóttir. Netfang kjörstjórnar er kjorstjorn@bondi.is.