Lambhrútaskoðunin haustið 2008

Úrvinnslu á niðurstöðum fyrir hrútalömbin undan sæðingastöðvahrútunum er nú lokið. Þessar niðurstöður má skoða í tveim töflum. Þessar niðurstöður mun einnig verða að finna í hrútaskrá stöðvanna sem kemur innan skamms tíma.

Niðurstöðurnar úr ómmælingunum eru þannig að þær tölur eru leiðréttar fyrir örfáum ytri þáttum sem vitað er að hafa áhrif á niðurstöður. Þar er í fyrsta lagi um að ræða mun á mælitækjunum sem notuð eru en þar eru tvær gerðir af ómsjám sem þekkt er að gefa mismunandi mælingar fyrir þykkt bakvöðvans. Þá eru einnig nokkur áhrif frá leiðréttingu vegna mismunandi þunga lambanna á fæti, þannig að þær tölur sem hér eru birtar sýna því mælingarnar miðað við að öll lömbin væru skoðuð við sama þunga. Að síðustu er tekið tillit til þess hvernig lambið gekk (einlembingur, tvílembingur o.s.frv.).

Taflan um niðurstöður um stigun lambanna er aftur á móti þannig að þær eru allar beinar meðaltalstölur án nokkurra leiðbeininga.

Heildarfjöldi lamba er aðeins færri lömb en var á síðasta ári og mun fremur skýrast af því að ekki voru öll gögn komin til skráningar fremur en að skoðuð hafi verið færri lömb í haust en áður. Hóparnir fyrir langflesta hrútana telja mikinn lambafjölda og gefa því mjög glögga mynd fyrir þá. Hins vegar eru örfáir hrútar, sérstaklega kollóttir, sem eiga full fáa syni til skoðunar til að draga af þessu of miklar ályktanir.

Í heildina er ljóst að þessir hrútar stöðvanna hafa verið að skila gríðarlega mörgum ákaflega glæsilegum lömbum í haust. Ekki þótti ástæða til að taka úr notkun marga hrúta vegna slakrar niðurstöðu úr þessari skoðun, heldur frekar hrúta sem höfðu hlotið litla notkun.